رانا ثنا ء اللہ  نے وفاقی وزیر ریلوے شیخ رشید احمد کو سیاسی گیدڑ قرار دیتے ہوئے کہا کہ شیخ رشید جیسے سیاسی گیدڑ ہی نیب نیازی گٹھ جوڑ کو ٹارزن سمجھ سکتے ہیں۔

پاکستان مسلم لیگ (ن) پنجاب کے صدر رانا ثناءاللہ نے وزیر ریلوے شیخ رشید احمد کے بیان پر ردعمل دیتے ہوئے کہا کہ نیب نیازی گٹھ جوڑ حکومتی مشینری استعمال کر کے میاں محمد شہباز شریف کو جیل میں ڈالنے کا جتن کر رہا ہے، انہیں کورونا وائرس کی کوئی فکر نہیں ہے۔

انہوں نے کہا کہ شیخ رشید احمد جیسے سیاسی گیدڑ ہی نیب نیازی گٹھ جوڑ کو ٹارزن سمجھ سکتے ہیں۔ شہباز شریف کی اصل طاقت پاکستان کے عوام ہیں، اللہ کے سوا کسی کا خوف نہیں ہے۔ شیخ رشید جیسے سیاسی شیطان کے مقدر میں رمضان کے مہینے میں بھی سچ بولنا نہیں ہے۔

رانا ثنا ء اللہ کا کہنا تھا کہ شیخ رشید چیئرمین نیب کے کہنے پر شہباز شریف کے خلاف بیان دیتے ہیں۔ شہباز شریف عوام کو کرپٹ، جھوٹے، نالائق، نااہل اور آٹا چینی چوروں سے بچانے آیا ہے۔  پوری کی پوری حکومت شہباز شریف کے خوف میں مبتلا ہے۔ شہباز شریف کے لندن سے واپس آنے کے بعد سے حکومت کے ستارے گردش میں آگئے ہیں۔

رانا ثنا ءاللہ کا مزید کہنا تھا کہ سیاسی یتیموں کی جماعت پی ٹی آئی کو پاکستان کے عوام نے مسترد کر دیا ہے۔ شیخ رشید کی مثال کیا پدی اور کیا پدی کا شورابہ ہے۔ مشرف کی باقیات شہباز کو جیل سے ڈرانے کی ناکام کوشش نہ کریں۔ شیدا ٹلی اپنی وزارت اور دو سال میں 100 مسافروں کے قتل کا جواب دے۔ شیدا ٹلی نیب نیازی گٹھ جوڑ کا وکیل ہے۔